قصيدة: الكون غابه

لا تهاب،
وانت في صدرك خطاب،
قول، لا تسكت لـ احد
واخضع لواحد أحد
واتّقي يوم الحساب،

البشر تبقى بشر
ما تعدّوا مستواك
واللي يتعدّى حدوده
سامحه مره،
بعد مره
بعد مره
واقدح بوجهه شراره
صوت واضح في قراره،
لا يهمك من يكون
إنت حدّد من تكون
يا تكون بْدون قيمه
أو عظيمٍ بـ العيون

لا تموت بْغير يومك
يعني عايش:
لا قرار،
وّلا وقار،
شخص ماله إعتبار
وانت باقي لك عمر
وانت باقي لك لسان
لا يهينك، مين كان،
الفلان ابن الفلاني
يبقى [إنسان وفلان]
لا يحرّك فيك ساكن
أو ينكّس لك مقام
دام ربي جل شانه
سخّرك: مرفوع شان
انزع هْدوم التواضع
واجه بْقوّه، ودافع،
علّمه إن الأدب
لا يعبّر عن شعورٍ
[دوم خاضع]

يركد،
وتجعله عِبره،
للذي منفوخ صدره،
ذي نصيحه من مجرّب،
والزمن يعطي دروس
هذّبت بعض النفوس
من حفَظها نال خبره

خادم ويستعبدونه
كل حزّه يأمرونه
يكرفونه
يظلمونه
وان طلب منهم مقابل،
بالمقابل يحرمونه

عشرتي معهم طويله
ماهي بس: لحظة ثواني
ما رضيت ارخص مكاني
صاين بْصمتي لساني
في زمن ما هو بحاني
ما ستَر أول ، وثاني
كم وكم واحد يعاني
صار عبره في زماني
وقتها صمتي رعاني
دافن بصدري: معاني
لو جرح سرّي محاني
ما جرح عزّي وشاني]
وان بلاني من جفاني
ما جفاني لو بلاني
كانه الموقف حداني
ذا لساني، ذا كياني
ما أميّل إتزاني
أو أفكر في هواني
يا أعظّمني عشاني
يا عساني ما عساني..

ما رضيت الذل مرّه
عزّتي عن ألف: حَرّه
كل شي إلا الكرامه
أندفن [والنفس حُرّه]

جايز أزعِل،
جايز أرضي،
أو تزعّلني وأرضى
في حدود الإحترام
هذا هو حال الأنام،

لا تهاب،
لو شعورك في مهابه
منكسر طول السنين
باع نفسه للأنين،
سَهّل الموقف ومرّر،
اقنع الرهبه وكرّر،
[للشجاعه: إمتحان]
الزمن مابه أمان،
كل موطن به مواطن
أشبه بوصف الذيابه
عيش بـ الدنيا وحاذر
[دام هذا الكون غابه]


#خليل_الجابري
ق. C002151D8