جمعه الخياط . جدة


لو قلنا في في التعليم عنف
يزعلوا ويهيجوا
ويهددونا يرفعوا دعوة علينا
ويقولوا مافي عنف ..

ولو قلنا في في الصحة عنف
برضه بيزعلوا
وانت مو متخصص
كيف تهرج في إيلي مالك فيه
سيب المتخصصين يتكلموا

ولو قلنا في في
رجال المرور عنف
قالوا انت ما تعرف الظروف
مو من حقك تتكلم
انت بتهاجم المسؤلين

ولو قلنا هادا دليل
وواضح وزيه شفنا
قبل كدة في اشرطة كثير

يقولوا تصرفات فردية
طيب هادا ظهر للعيان
ولكن ما خفى كان اعظم
الله المستعان

ياعالم احنا مثقفين
وواجبنا النصح
واظهار السلبيات المجتمعية
لولي الأمر
وهو ليطلب منا كمثقفين ذلك
ليش بيتشالوا الوزراء
مش ل انهم اخفقوا في علاج مشكلة للمواطن

احنا هذا دورنا كمثقفين
حتى لو اتهمونا بغير الاختصاص
احنا خبراء الكلمة ورواد القلم
لازم نقول عندنا هنا مشكلة
عشان نعالجها
ولازم نقول للغلط غلط
عشان يتصحح

وإن سكتنا عن الغلط
قالوا جبناء وخوافين
وأن حكينا هاجمونا
ورفعوا علينا دعوات
بعدم التخصص
وانه احنا ما بنفهم فيه

وما عندنا عنف
مجرد ايذاء ومو موجود ..
ممنوع ..
بالله بس
عشان نخفف في المعني
نقول ايذاء مو عنف
العنف هو الايذاء
والايذاء هو العنف ..
بس المطلوب
لازم نغرس روسنا
في الأرض كالنعام..
الله يكون في عوننا
ويحفظنا ويكرمنا
ويقدرنا نقول ما تمليه علينا مسؤليتنا الاجتماعية ككتاب
وباحثين في حلول
مشاكل المجتمع .
مش باحثين بشهادات
باحثين بعقولنا إيلي ربي
ميزنا بها عن البشر
لنفكر ونتدبر بها
ونعالج أمورنا بنفسنا
صح نحتاج النظريات الأوربية والأمريكية
لكن مجتمعنا غير
وشعوبنا العربية
وخاصة الخليجية غير
فينا عقول تفكر وتتدبر
وتنتج وتبتكر وتخترع كمان
مو بس تحل المشاكل

عموما عليكم أن تعرفوا
أن ولاة الأمر
وضعوا المسؤلين لخدمة المواطن
ولو ثبت لهم انهم اخفقوا
أو قصروا في مهمتهم بيقالوا
ويوضع غيرهم.